سرحد چين ايدى حالا سرحد اسلامدر و ايچروده اولان شهرلرى خاقانه متعلقدر و انده حاصل اولان متاعك اعظمى يشم طاشيدر و ختنده ايكى نهروار در كه برينه اق قاش ديرلراندن يشم سفيد حاصل اولور و ديكرينه قره‌قاش ديرلراندن يشل و سياه چقار وقتنده اول نهرلرك صولرى طاشوب بعده نزول ايتدكده اون كوندنصكره نهر مذكوره نك كنارندن يشم دوشررلر و قانونلرنجه بيوكلرى پادشاهه مخصوصدر خرده‌لرى جمع ايدن كمسنه‌لر كدر و يشمك معدنى غائبدر كورمش كمسنه يوقدر نقل ايدرلر كه اهل اللهدن بريسنه كشف اولوب خبر و يرمشكه حيواندن اولاد طوغديغى كبى يشم دخى اول ديارك طاغلرنده اولان طاشلردن ظهور ايدر و طوغديغى زمانده ناله‌لر ظاهر اولوب كوزدن ياش اينركبى چقارويره دوشدكده‌اب و هوا تأثيرندن قدرت و فرمان حى و منان ايله عاش اولور و ممالك خطايده اندن معتبر بر جوهر يوقدر و ملك چينك اون ايكنجى قسمى نهايت انقطاع عرضده كه درياى مشرقك كناريدر وانده ايكى شهر معظم واردر كه برنيك ادى وان سى و برينه وان دون ديرلر و اول ايكى شهرك بيوكلكى خانبالغ كبيدر و انده حاصل اولان متاع شكردر و كثرتى اول مرتبه ده در كه اوج درهم كموشه بر من عراقى ويررلر و اول ولايت غايتده اسيدر * باب العاشر اهل چينك صحبت و طوى و انك ترتيب و تعظيملرى بياننده در * اهل چينك صحبت و طويلرى كبى تعظيم و تفحيملرى مثال هيچ بر اقليم خلقنه ميسر اولمامشدر و صورت عشرتلرنيك ترتيبى بودر كه كرك طشرده ده اولان باغ و بستان و كرك بستان سرايلرنده اولان مكانلرك بر جانبلرنده مثال سرو و ارغوان موزون فدانلر ديكوب برطرفنده انواع كللر و شكوفه‌لر وضع ايدرك و بونلرك مقابله سنده رنكارنك صنداليه‌لر قوروب اصناف نعمت و ميوه‌لر و صراحيلرله اراسته و خوبان خطا ييلرك سازنده و نوازنده و كوينده‌لريله پيراسته اولوب اوقات فراغتلرنده صحبتلرينه مشغول اولورلر و اكثر سازنده و خواننده‌لرى حسن باكره دختر سعد تاخترلر در خصوصا خواننده‌لرى داوودى الحان اولمينلره اصلا تعليم ايتديرمزلر اول جهتدنكه هر امورى حكمت اوزره ملاحظه ايدوب على الخصوص مجلس شربه لايق اولان حسن روى و خوب او ازدر كه زيب و زينت ويره قطعه خوبى روى خوبى او از مىبرد هر يكى به تنهادل چون شود هردو جمع در يكى جاى كار صاحب دلان شود نثر محللرنده كروه كروه خلق اول تزيين اولان صنداليه‌لر اوزرنده اول موزون دراختلر و چارطاقلر و رواقلر كه كل و ميوه‌لر له يرزين اولمشدر